raah-e-talab me.n kaun kisii kaa apane bhii begaane hai.n
chaa.Nd se mukha.De rashk-e-Gazalaa.N sab jaane pehachaane hai.n

uff ye talaash-e-husn-o-haqiiqat kis jaa Thahare.n jaaye.n kahaa.N
sahan-e-chaman me.n phuul khile hai.n seharaa me.n diivaane hai.n

tanahaaii hii tanahaaii hai kaise kahe.n kaise samajhaaye.N
chashmo-o-lab-o-ruKhasaar kii tah me.n ruuho.n ke viiraane hai.n

apane vajuud kii mastii se ham ri.ndo.n ke ahavaal na puuchh
qadam qadam par chhe.D Khirad se nafas nafas maiKhaane hai.n

dil aaKhir thak haar ke yaaro ham ne bhii tasliim kiyaa
apanii zaat se ishq hai sachchaa baaqii sab afasaane hai.n

nigaar-e-shauq kii bebaakiyo.n se kyaa haasil
jo dil udaas ho rangiiniyo.n se kyaa haasil

na ab vo raat na vo husn-e-garmii-e-mahafil
chiraaG-e-sub_huu tunak taabiyo.n say kyaa haasil

fasurdagii kii qasam azm laa makaa.N tak hai
na puuchh dost ke tanhaaiiyo.n se kyaa haasil

lahuu lahuu hai ufaq shaam muzamahil sii hai
tumhii.n bataao ke in surKhiyo.n se kyaa haasil

jo buu-e-gul pe na ho unakii dastras ai dil
chaman me.n aisii bhii paaba.ndiyo.n se kyaa haasil

chhalakatii aaye ke apanii talab se bhii kam aaye
hamaare saamane saaqii baa-saaGar-e-Jam aaye

ajiib baat ke kiicha.D me.n lahalahaaye ka.Nval
phaTe puraane se jismo.n pe sajake resham aaye

masiih kaun bane saare haath aaluudaa
lahuu-luhaan hai dhartii kahaa.N se maraham aaye

nigaar-e subhuu se puuchhe.nge shab guzarane do
ke zulmato.n se ulajhakar vo aaii yaa ham aaye

bas ek ham hii liye jaaye.n dars-e-ijz-o-niyaaz
kabhii to aka.Dii huii gardano.n me.n bhii Kham aaye