vo ishq jo ham se ruuTh gayaa ab us kaa haal bataaye.N kyaa
ko_ii mehar nahii.n ko_ii qahar nahii.n phir sachchaa sher sunaaye.N kyaa 

ik hijr jo ham ko laahak hai taa der use doharaaye.N kyaa
vo zahar jo dil me.n utaar liyaa phir us ke naaz uThaaye.N kyaa 

ik aag Gam-e-tanhaa_ii kii jo saare badan me.n phail ga_ii
jab jism hii saaraa jalataa ho phir daaman-e-dil ko bachaaye.N kyaa 

ham naGmaasaraa kuchh Gazalo.n ke ham surat_gar kuchh Khvaabo.n ke
bejazbaa-e-shauq sunaaye.N kyaa ko_ii Khvaab na ho to bataaye.N kyaa 

sochate aur jaagate saa.Nso.n kaa ik dariyaa huu.N mai.n
apane gum_gashtaa kinaaro.n ke liye bahataa huu.N mai.n 

[gum-gashtaa=lost] 

jal gayaa saaraa badan in mausamo.n kii aag me.n
ek mausam ruuh kaa hai jis me.n ab zindaa huu.N mai.n 

mere ho.nTho.n kaa tabassum de gayaa dhokhaa tujhe
tuune mujhako baaG jaanaa dekh le seharaa huu.N mai.n 

dekhiye merii paziraa_ii ko ab aataa hai kaun
lamhaa bhar ko vaqt kii dahaliiz par aayaa huu.N mai.n 

lamho.n ke aazaab sah rahaa huu.N
mai.n apane vajuud kii sazaa huu.N

zaKhmo.n ke gulaab khil rahe hai.n
Khushbuu ke hujuum me.n kha.Daa huu.N

is dasht-e-talab me.n ik mai.n bhii
sadiyo.n kii thakii hu_ii sadaa huu.N

benaam-o-numuud zindagii kaa
ik bojhaa uThaaye phir rahaa huu.N

ik aisaa chaman hai jis kii Khushbuu
saa.Nso.n me.n basaaye phir rahaa huu.N

ik aisii zamii.n hai jis ko chhuukar
takadiis-e-haram se aashnaa huu.N

ai mujh ko fareb dene vaale
mai.n tujh par yaqiin kar chukaa huu.N

mai.n tere qariib aate aate
kuchh aur bhii duur ho gayaa huu.N

kabhii saayaa hai kabhii dhuup muqaddar meraa
hotaa rahataa hai yuu.N hii qarz baraabar meraa

TuuT jaate hai.n kabhii mere kinaare mujh me.n
Duub jaataa hai kabhii mujh me.n samandar meraa

kisii saharaa me.n bichha.D jaaye.nge sab yaar mere
kisii jangal me.n bhaTak jaayegaa lashkar meraa

baavafaa thaa to mujhe puuchhane vaale bhii na the
bevafaa huu.N to huaa naam bhii ghar ghar meraa

kitane ha.Nsate hue mausam abhii aate lekin
ek hii dhuup ne kumhalaa diyaa manzar meraa

aaKhirii jur’a-e-pur_kaif ho shaayad baaqii
ab jo chhalakaa to chhalak jaayegaa saaGar meraa

itane dino.n ke baad tuu aayaa hai aaj
sochataa huu.N kis tarah tujh se miluu.N

mere andar jaag uThii ik chaa.Ndanii
mai.n zamii.n se aasamaa.N tak ek ang huu.N

aur ujalaa ho gayaa qurbat kaa chaa.Nd
aur gaharaa ho gayaa teraa fusuu.N

[qurbat = nearness; fusuu.N = magic]

ai saraapaa rang-o-nikahat tuu bataa
kis dhanak se teraa pairaahan bunuu.N

[saraapaa rang-o-nikahat = colour and fragrance from head to toe**]
[** the very epitome of beauty]
[pairaahan = garment/dress]

saare gul_buuTe tar-o-taazaa hue
duur tak pahu.Nchii hai merii mauj-e-Khuu.N

kar rahe hai.n lamhe lamhe kaa hisaab
mil ke phir baiThe hai.n yaaraan-e-junuu.N

dasht-e-Gam kii dhuup me.n mujh par khulaa
mai.n Khud apanaa saayaa-e-diivaar huu.N

naaz kar Khud par ki tuu hai beshumaar
qadr kar merii ki mai.n bas ek huu.N