yuu.N na mil mujh se Khafaa ho jaise
saath chal mauj-e-sabaa ho jaise

log yuu.N dekh kar ha.Ns dete hai.n
tuu mujhe bhuul gayaa ho jaise

ishq ko shirk kii had tak na ba.Daa
yuu.N na mil hamase Khudaa ho jaise

maut bhii aa_ii to is naaz ke saath
mujhape ehasaan kiyaa ho jaise

aise a.njaan bane baiThe ho
tum ko kuchh bhii na pataa ho jaise

hichakiyaa.N raat ko aatii hii rahii.n
tuu ne phir yaad kiyaa ho jaise

zindagii biit rahii hai "daanish"
ek bejurm sazaa ho jaise

sirf ashk-o-tabassum me.n ulajhe rahe
hamane dekhaa nahii.n zindagii kii taraf

raat Dhalate jab unakaa Khayaal aa gayaa
Tik-Tikii ba.Ndh ga_ii chaa.Ndanii kii taraf

kaun saa jurm hai,kyaa sitam ho gayaa
aa.Nkh agar uTh ga_ii, aap hii kii taraf

jaane vo multafit ho.n kidhar bazm me.n
aa.Nsuuo.n kii taraf yaa ha.Nsii kii taraf

purasish-e-Gam kaa shukriyaa, kyaa tujhe aagahii nahii.n
tere baGair zindagii dard hai, zindagii nahii.n

[aagahii=knowledge]

daur thaa ek guzar gayaa, nashaa thaa ek utar gayaa
ab vo muqaam hai jahaa.N shikvaa-e-beruKhii nahii.n

tere sivaa karuu.N pasa.nd kyaa terii qaayanaat me.n
dono.n jahaa.N kii ne_amate.n, qiimat-e-ba.ndagii nahii.n

laakh zamaanaa zulm Dhaaye, vaqt na vo Khudaa dikhaaye
jab mujhe ho yaqii.n ki tuu haasil-e-zindagii nahii.n

dil kii shaguftagii ke saath raahat-e-mayakadaa ga_ii
fursat-e-mayakashi to hai, hasarat-e-mayakashii ga_ii

[shaguftagii=to bloom]

zaKhm pe zaKhm khaake jii, apane lahuu ke ghuu.NT pii
aah na kar, labo.n ko sii, ishq hai dillagii nahii.n

dekh ke Khushk-o-zard phuul, dil hai kuchh is tarah maluul
jaise terii Khizaa.N ke baad, daur-e-bahaar hii nahii.n

nazar fareb-e-kazaa khaa ga_ii to kyaa hogaa
hayaat maut se Takaraa ga_ii to kyaa hogaa

[fareb-e-kazaa=illusion of death]

na_ii sahar ke bahut log mu.ntazir hai.n magar
na-ii sahar bhii kajalaa ga_ii to kyaa hogaa

na rahanumaao.n kii majalis me.n le chalo mujhako
mai.n be-adab huu.N ha.Nsii aa ga_ii to kyaa hogaa

Gam-e-hayaat se beshaq hai Khudakushii aasaa.N
magar jo maut bhii sharmaa ga_ii to kyaa hogaa

shabaab-e-laalaa-o-gul ko pukaaranevaalo.n
Khizaa.N-sirisht bahaar aa ga+ii to kya hogaa

[shabaab-e-laalaa-o-gul=beauty of flowers]
[Khizaa.N-e-sirisht=in the form of fall/winter]

ye fikr kar ki is aasuudagii ke dhoke me.n
terii Khudii ko bhii maut aa ga_ii to kyaa hogaa

[aasuudagii=contentment

Khushii chinii hai to Gam kaa bhii aitamaad na kar
jo ruuh Gam se bhii ukataa ga_ii to kyaa hogaa

kabhii mujh ko saath lekar, kabhii mere saath chal kar
vo badal gaye achaanak merii zindagii badal kar

huye jis pe meharabaa.N tum ko_ii Khush_nasiib hogaa
merii hasarate.n to nikalii.n mere aa.Nsuuo.n me.n Dhal ke

terii zulf-o-ruKh ke qurbaa.N dil-e-zaar Dhuu.NDhataa hai
vahii champa_ii ujaale vahii surama_ii dhu.ndalake

ko_ii phuul ban gayaa hai ko_ii chaa.Nd ko_ii taaraa
jo chiraaG bujh gaye hai.n terii a.njuman me.n jal ke

mere dosto Khudaaraa mere saath tum bhii Dhuu.NDo
vo yahii.n kahii.n chhupe hai.n mere Gam kaa ruKh badal ke

terii bejhijhak ha.Nsii se na kisii kaa dil ho mailaa
ye nagar hai aa_iino.n kaa yahaa.N saa.Ns le sambhal ke