tasviir terii dil meraa bahalaa na sakegii
ye terii tarah mujh se to sharmaa na sakegii 

mai.n baat karuu.Ngaa to ye Khaamosh rahegii
siine se lagaa luu.Ngaa to ye kuchh na kahegii
aaraam vo kyaa degii jo ta.Dapaa na sakegii 

ye aa.Nkhe.n hai.n Tahharii huu_ii.n cha.nchal vo nigaahe.n
ye haath hai.n sahame huye aur mast vo baahe.n
parachhaa_ii to i.nsaan ke kaam aa na sakegii 

in ho.nTho.n ko "Faiyyaz" mai.n kuchh de na sakuu.Ngaa
is zulf ko mai.n haath me.n bhii le na sakuu.Ngaa
ulajhii hu_ii raato.n ko ye sulajhaa na sakegii 

Takaraa hii ga_ii merii nazar un kii nazar se
dhonaa hii pa.Daa haath mujhe qalb-o-jigar se 

izhaar-e-mohabbat na kiyaa bas isii Dar se
aisaa naa ho gir jaa uun kahii.n un kii nazar se 

ai zauq-e-talab josh-e-junuun ye to bataa de
jaanaa hai kahaa.N aur ham aaye hai.n kidhar se 

’Fayyaz’ ab aayaa hai junuun josh pe apanaa
ha.Nsataa hai zamaanaa mai.n guzarataa huun jidhar se 

na tum mere na dil meraa na jaan-e-naatavaa.N merii
tasavvur me.n bhii aa sakatii nahii.n majabuuriyaa.N merii 

na tum aaye na chain aayaa na maut aaii shab-e-vaadaa
dil-e-muztar thaa mai.n thaa aur thii betaabiyaa.N merii 

[dil-e-muztar=imaptient/anxious heart] 

abas naadaaniyo.n par aap apanii naaz karate hai.n
abhii dekhii kahaa.N hai.n aapane naadaaniyaa.N merii 

ye ma.nzil ye hasii.n ma.nzil javaanii naam hai jisakaa
yahaa.N se aur aage ba.Danaa ae umr-e-ravaa.N merii 

kam nahii.n merii zindagii ke liye
chain mil jaaye do gha.Dii ke liye

ai dil-e-zaar kaun hai teraa
kyo.n ta.Dapataa hai yuu.N kisii ke liye

kitane saamaan kar liye paidaa
itanii chhoTii sii zindagii ke liye

aisaa ’Faiyyaz’ Gam ne gheraa hai
lab taras hii gaye ha.Nsii ke liye

hame.n ko_ii Gam nahii.n thaa Gam-e-aashiqii se pahale
na thii dushmanii kisii se terii dostii se pahale 

hai ye merii badanasiibii teraa kyaa qasuur is me.n
tere Gam ne maar Daalaa mujhe zindagii se pahale 

meraa pyaar jal rahaa hai ai chaa.Nd aaj chhup jaa
kabhii pyaar thaa hame.n bhii terii chaa.Ndni se pahale 

mai.n kabhii na muskuraataa jo mujhe ye ilm hotaa
ki hazaaro.n Gam mile.nge mujhe ik Khushii se pahale 

ye ajiib imtehaa.N hai ki tumhii ko bhuulanaa hai
mile kab the is tarah ham tumhe.n bedilii se pahale 

aaj jaane kii zid na karo
yuu.N hii pahaluu me.n baiThe raho
haaye! mar jaaye.ge, ham to luT jaaye.ge
aisii baate.n kiyaa na karo 

tum hii socho zaraa kyuu.N na roke tumhe.n
jaan jaatii hai jab uThake jaate ho tum
tum ko apanii kasam jaan-e-jaa.N
baat itanii merii maan lo 

waqt kii qaid me.n zindagii hai magar
cha.nd gha.Diyaa.N yahii hai.n jo aazaad hai
in ko kho kar abhii jaan-e-jaa.N
umr bhar na taraste raho 

kitanaa maasuum-o-rangiin hai ye samaa
husn aur ishq kii aaj meraaj hai
kal ki kisako Khabar jaane-jaa.N
rok lo aaj kii raat ko 

gesuuo.n kii shikan hai abhii shabanamii
aur palako.n ke saaye bhii madahosh hai.n
husn-e-masuum ko jaane-jaa.N
beKhudii me.n na rusvaa karo