tujhii se ibtadaa hai tuu hii ik din i.ntahaa hogaa
sadaa-e-saaz hogii aur na saaz-e-besadaa hogaa

hame.n maaluum hai ham se suno mahashar me.n kyaa hogaa
sab us ko dekhate ho.nge vo hamako dekhataa hogaa

sar-e-mahashar ham aise aasiyo.n kaa aur kyaa hogaa
dar-e-jannat na vaa hogaa dar-e-rahamat to vaa hogaa

jahannum ho ki jannat jo bhii hogaa faisalaa hogaa
ye kyaa kam hai hamaaraa aur us kaa saamanaa hogaa

nigaah-e-qahar par hii jaan-o-dil sab khoye baiThaa hai
nigaah-e-mehar aashiq par agar hogii to kyaa hogaa

ye maanaa bhej degaa ham ko mahashar se jahannum me.n
magar jo dil pe guzaregii vo dil hii jaanataa hogaa

samajhataa kyaa hai tuu diivaanaagaanaa-e-ishq ko zaahid
ye ho jaaye.nge jis jaanib usii jaanib Khudaa hogaa

"Jigar" kaa haath hogaa hashr me.n aur daaman-e-hazarat
shikaayat ho ki shikavaa jo bhii hogaa baramalaa hogaa

tabiiyat in dino.n begaanaa-e-Gam hotii jaatii hai
mere hisse kii goyaa har Khushii kam hotiii jaatii hai 

vahii hai shaahid-o-saaqii, magar dil bujhataa jaataa hai
vahii hai shammaa lekin roshanii kam hotii jaatii hai 

qayaamat kya ye ae husn-e-do aalam hotii jaatii hai
ke mahafil to wahii hai, dil_kashii kam hotii jaatii hai 

vahii maikhaana-o-sahabaa, vahii saaGar wahii shiishaa
magar aavaaz-e-noshaanosh maddham hotii jaatii hai 

vahii hai zi.ndagii lekin ’Jigar’ ye haal hai apanaa
ke jaise zi.ndagii se zi.ndagii kam hotii jaatii hai 

shaayar-e-fitarat huu.N mai.n jab fikr farmaataa huu.N mai.n
ruuh ban kar zarre-zarre me.n samaa jaataa huu.N mai.n

[shaayar-e-fitarat=poet of nature; fikr farmaanaa=express a thought]

aa ki tujh bin is tarah ai dost ghabaraataa huu.N mai.n
jaise har shay me.n kisii shay kii kamii paataa huu.N mai.n

jis qadar afasaanaa-e-hastii ko doharaataa huu.N mai.n
aur bhii begaanaa-e-hastii huaa jaataa huu.N mai.n

[afasaanaa-e-hastii=tale of life; begaanaa-e-hastii=unrelated to life]

jab makaan-o-laamakaa.N sab se guzar jaataa huu.N mai.n
allah-allaah tujh ko Khud apanii jagah paataa huu.N mai.n

[makaan-o-laamakaa.N=

haaye rii majabuuriyaa.N tark-e-mohabbat ke liye
mujh ko samajhaate hai.n vo aur un ko samajhaataa huu.N mai.n

[tark-e-mohabbat=to give up love]

merii himmat dekhanaa merii tabiiyat dekhanaa
jo sulajh jaatii hai gutthii phir se ulajhaataa huu.N mai.n

[gutthii=knot (problem)]

husn ko kyaa dushmanii hai ishq ko kyaa bair hai
apane hii qadamo.n kii Khud hii Thokare.n khaataa huu.N mai.n

terii mahafil tere jalve phir taqaazaa kyaa zaruur
le uThaa jaataa huu.N zaalim le chalaa jaataa huu.N mai.n

vaah re shauq-e-shahaadat kuu-e-qaatil kii taraf
gun-gunaataa raqs karataa jhumataa jaataa huu.N mai.n

[shauq-e-shahaadat=love/desire for martyrdom]
[kuu-e-qaatil=killer’s (lover’s) lane; raqs=dance]

dekhanaa us ishq kii ye turfaakaarii dekhanaa
vo jafaa karate hai.n mujh par aur sharmaataa huu.N mai.n

[turfaakaarii=

ek dil hai aur tuufaan-e-havaadis ai "Jigar"
ek shiishaa hai ki har patthar se Takaraataa huu.N mai.n

saaqii par ilzaam na aaye
chaahe tujh tak jaam na aaye

tere sivaa jo kii ho muhabbat
merii javaanii kaam na aaye

jin ke liye mar bhii gaye ham
vo chal kar do gaam na aaye

ishq kaa saudaa itanaa garaa.N hai
i.nhe.n ham se kaam na aaye

[garaa.N=difficult]

maiKhaane me.n sab hii to aaye
lekin "Jigar" kaa naam na aaye

saaqii kii har nigaah pe bal khaa ke pii gayaa
laharo.n se khelataa huaa laharaa ke pii gayaa

bekaifiyo.n ke kaif se ghabaraa ke pii gayaa
taubaa ko to.D taa.D ke tharraa ke pii gayaa

[bekaifii=unintoxicating (unpleasant); kaif=intoxication]

zaahid ye merii shoKhii-e-ri.ndaanaa dekhanaa
rahamat ko baato.n baato.n me.n bahalaa ke pii gayaa

[zaahid=wise man; shoKhii=mischief/restlessness; ri.ndaanaa=drunk]
[rahamat=benevolence]

sarmastii-e-azal mujhe jab yaad aa ga_ii
duniyaa-e-aitabaar ko Thukaraa ke pii gayaa

aazuurdagii-e-Khaatir-e-saaqii ko dekh kar

ai rahamat-e-tamaam merii har Khataa mua’af
mai.n i.ntahaa-e-shauq me.n ghabaraa ke pii gayaa

[Khataa=mistake; mu’aaf=pardon; i.ntahaa-e-shauq=limits of desire]

piitaa beGair izan ye kab thii merii majaal
dar-pardaa chashm-e-yaar kii shah paa ke pii gayaa

[izan=permission/order; majaal=dare; dar-pardaa=hidden]
[chashm-e-yaar=beloved’s eyes]

us jaan-e-mayakadaa kii qasam baarahaa "Jigar"
kul aalam-e-bisaat pe mai.n chhaa ke pii gayaa

os pade bahaar par aag lage kanaar me.n
tum jo nahii.n kanaar me.n luTf hii kya bahaar me.n

us pe kare Khudaa raham gardish-e-rozagaar me.n
apanii talaash cho.Dakar jo hai talaash-e-yaar me.n

ham kahii.n jaanevaale hai.n daaman-e-ishq cho.Dakar
ziist tere huzuur me.n, maut tere dayaar me.n

niyaaz-o-naaz ke jhaga.De miTaaye jaate hai.n
ham un me.n aur vo ham me.n samaaye jaate hai.n

ye naaz-e-husn to dekho ki dil ko ta.Dapaakar
nazar milaate nahii.n muskuraaye jaate hai.n

mere junuun-e-tamannaa kaa kuchh Khayaal nahii.n
lajaaye jaate hai.n daaman chhu.Daaye jaate hai.n

jo dil se uThate hai.n shole vo a.ng ban ban kar
tamaam ma.nzar-e-fitarat pe chhaye jaate hai.n

mai.n apanii aah ke sadaqe ki merii aah me.n bhii
terii nigaah ke a.ndaaz paaye jaate hai.n

ye apanii tark-e-muhabbat bhii kyaa muhabbat hai
ji.nhe.n bhulaate hai.n vo yaad aaye jaate hai.n

mujhe de rahe.n hai.n tasalliyaa.N vo har ek taazaa payaam se
kabhii aake manzar-e-aam par kabhii haT ke manzar-e-aam se 

na Garaz kisii se na vaastaa, mujhe kaam apane hii kaam se
tere zikr se, terii fikr se, terii yaad se, tere naam se 

mere saaqiyaa, mere saaqiyaa, tujhe marahabaa, tujhe marahabaa
tuu pilaaye jaa, tuu pilaaye jaa, isii chashm-e-jaam ba jaam se 

terii subh-o-aish hai kyaa balaa, tujhe ae falak jo ho hausalaa
kabhii karale aake muqaabilaa, Gam-e-hijr-e-yaar kii shaam se 

muddat me.n vo phir taazaa mulaaqaat kaa aalam
Khaamosh adaao.n me.n vo jazbaat kaa aalam

allaah re vo shiddat-e-jazbaat kaa aalam
kuchh kah ke vo bhuulii hu_ii har baat kaa aalam

[shiddat=intensity]

aariz se Dhalakate hu_e shabanam ke vo qatare
aa.Nkho.n se jhalakataa huaa barasaat kaa aalam

vo nazaro.n hii nazaro.n me.n savaalaat kii duniyaa
vo aa.Nkho.n hii aa.Nkho.n me.n javaabaat kaa aalam