haal-e-dil mai.n ne jo duniyaa ko sunaanaa chaahaa
mujh ko har shaKhs ne dil apanaa dikhaanaa chaahaa

[shaKhs = person]

apanii tasviir banaane ke liye duniyaa me.n
mai.n ne har rang pe ik rang cha.Dhaanaa chaahaa

Khaak-e-dil jauhar-e-aa_iinaa ke kaam aa hii ga_ii
laakh duniyaa ne nigaaho.n se giraanaa chaahaa

sholaa-e-barq se gulashan ko bachaane ke liye
mai.n ne har aag ko siine me.n chhupaanaa chaahaa

[sholaa-e-barq = spark of lightning; gulashan = garden]

apane aibo.n ko chhupaane ke liye duniyaa me.n
mai.n ne har shaKhs pe ilzaam lagaanaa chaahaa

[aib = vice/fault; ilzaam = allegation/accusation]

Gairat-e-mauj use phe.nk ga_ii saahil par
Duubane vaale ne jab shor machaanaa chaahaa

terii hii tarah hame.n yaad aane vaalaa ho
tere sivaa bhii ko_ii to sataane vaalaa ho 

har ek subah yahii dil me.n huuk uThatii hai
hame.n bhii naaz se ko_ii jagane vaalaa ho 

vo kis ummiid me.n ghar me.n rahe.n ki jis ghar me.n
na aane vaalaa ho ko_ii na jaane vaalaa ho 

har ek se nazare.n milaa_ii hai.n un ke kuuche me.n
ki jaise ab ko_ii ham ko bulaane vaalaa ho 

hai dosto ke liye aa_iinaa nazar merii
nazar milaaye jo nazare.n milaane vaalaa ho 

ki jaise ko_ii balaa mujhape aane vaalii hai
haraas kahataa hai ko_ii bachaane vaalaa ho 

[haraas=fear] 

hamaare shahar me.n kyaa kyaa saje-sajaaye hai.n ghar
hamaare ghar ko bhii ko_ii sajaane vaala ho