tarz jiine kaa sikhatii hai mujhe
tashnagii zahar pilaatii hai mujhe 

[tarz=style; tashnagii=thirst] 

raat bhar rahatii hai kis baat kii dhun
na jagaatii hai na sulaatii hai mujhe 

ruuThataa huu.N jo kabhii duniyaa se
zindagii aake manaatii hai mujhe 

aa_iinaa dekhuu.N to kyuu.Nkar dekhuu.N
yaad ik shaKhs kii aatii hai mujhe 

ba.nd karataa huu.N jo aa.Nkhe.n kyaa kyaa
roshanii sii nazar aatii hai mujhe 

ko_ii mil jaaye to raastaa kaT jaaye
apanii parachaa_ii Daraatii hai mujhe 

ab to ye bhuul gayaa kis kii talab
des parades phiraatii hai mujhe 

[talab=desire] 

kaise ho Khatm kahaanii Gam kii
ab to kuchh nii.nd sii aatii hai mujhe 

ruKh me.n gard-e-malaal thii kyaa thii
haasil-e-maah-o-saal thii kyaa thii 

[gard-e-malaal=dust of sorrow; haasil=result]
[maah-o-saal=months and years] 

ek suurat sii yaad hai ab bhii
aap apanii misaal thii kyaa thii 

[misaal=example] 

mere jaanib uThii thii ko_ii nigaah
ek mubaham savaal thii kyaa thii 

[jaanib=towards; mubaham=vague] 

us ko paakar bhii us ko paa na sakaa
justajuu-e-jamaal thii kyaa thii 

[justajuu=search; jamaal=beauty] 

dil me.n thii par labo.n tak aa na sakii
aarazuu-e-visaal thii kyaa thii 

[aarazuu=desire; visaal=union] 

umr bhar me.n bas ek baar aa_ii
sa’at-e-laazavaal thii kyaa thii 

[sa’at=moment; laazavaal=imperishable] 

ko_ii Khvaahaa.N na thaa ki jins-e-hunar
ek muflis kaa maal thii kyaa thii 

jalataa nahii.n aur jal rahaa huu.N
kis aag me.n mai.n pighal rahaa huu.N 

mafaluuj hai.n haath-paa.Nv mere
phir zahan me.n kyuu.N chal rahaa huu.N 

[mafaluuj=useless] 

raa_ii kaa banaa ke ek parvat
ab is pe Khud hii phisal rahaa huu.N 

kis haath se haath mai.n milaa_uu.N
ab apane hii haath mal rahaa huu.N 

kyo.n aa_iinaa baar baar dekhuu.N
mai.n aaj nahii.n jo kal rahaa huu.N 

ab kaun saa dar rahaa hai baaqii
us dar se kyo.n mai.n nikal rahaa huu.N 

qadamo.n ke tale to kuchh nahii.n hai
kis chiiz ko mai.n kuchal rahaa huu.N 

ab ko_ii nahii.n rahaa sahaaraa
mai.n aaj se phir sambhal rahaa huu.N 

ye barf haTaao mere sar se
mai.n aaj kuchh aur jal rahaa huu.N 

dil kii dil me.n na rah jaaye ye kahaanii kah lo
chaahe do harf likho chaahe zabaanii kah lo

[zabaanii = verbally]

mai.n ne marane kii duaa maa.Ngii vo puurii na hu_ii
bas is ko mere jiine kii kahaanii kah lo

sar_sar-e-vaqt u.Daa le ga_ii ruudaad-e-hayaat
vahii avaraaq jinhe.n ahad-e-javaanii kah lo

[sar_sar-e-vaqt = winds of time; rudaad-e-hayaat = tale of life]
[avaraaq = pages; ahad-e-javaanii = youthful period]

tum se kahane kii na thii baat magar kah baiThaa
ab ise merii tabiyat kii ravaanii kah lo

vahii ik qissaa zamaane ko meraa yaad rahaa
vahii ik baat jise aaj puraanii kah lo

ham pe jo guzarii hai bas us ko raqam karate hai.n
aap_biitii kaho yaa marsiyaa_Khvaanii kah lo