kahaaniyaa.N bhii ga_ii.n qissaa_Khvaaniyaa.N bhii ga_ii.n
vafaa ke baab kii sab bezubaaniyaa.N bhii ga_ii.n 

vo beziyaabii-e-Gam kii sabiil bhii na rahii
luTaa yuu.N dil kii sabhii be-sabaatiyaa.N bhii ga_ii.n 

havaa chalii to hare patte suukh kar TuuTe
vo subah aa_ii to hairaa.N_numaa_iiyaa.N bhii ga_ii.n 

ve meraa cheharaa mujhe aa_iine me.n apanaa lage
usii talab me.n badan kii nishaaniyaa.N bhii ga_ii.n 

palaT palaT ke tumhe.n dekhaa par mile bhii nahii.n
vo ahad-e-zabt bhii TuuTaa shitaabiyaa.N bhii ga_ii.n 

mujhe to aa.Nkh jhapakanaa bhii thaa garaa.N lekin
dil-o-nazar kii tasavvur_shi’aariyaa.N bhii ga_ii.n 

hasarat hai tujhe saamane baiThe kabhii dekhuu.N
mai.n tujh se muKhaatib huu.N teraa haal bhii puuchhuu.N

[muKhaatib honaa = to address someone]

dil me.n hai mulaaqaat kii Khvaahish kii dabii aag
mehandii lage haatho.n ko chhupaa kar kahaa.N rakhuu.N

[Khvaahish = desire]

jis naam se tuune mujhe bachapan se pukaaraa
ik umr guzarane pe bhii vo naam na bhuluu.N

tuu ashk hii ban ke merii aa.Nkho.n me.n samaa jaa
mai.n aa_iinaa dekhuu.N to teraa aks bhii dekhuu.N

[aks = reflection]

puuchhuu.N kabhii Guncho.n se sitaaro.n se havaa se
tujh se hii magar aa ke teraa naam na puuchhuu.N

[Gunchaa = flower bud]

ai merii tamannaa ke sitaare tuu kahaa.N hai
tuu aaye to ye jism shab-e-Gam ko na sau.npuu.N

ham ki maGaluub-e-gumaa.N the pahale
phir vahii.n hai.n ki jahaa.N the pahale

[maGaluub-e-gumaa.N = defeated by suspicion/doubt]

Khvaahishe.n jhurriyaa.N ban kar ubharii.n
zaKhm siine me.n nihaa.N the pahale

[jhurriyaa.N = wrinkles; nihaa.N = hidden]

ab to har baat pe ro dete hai.n
vaaqif-e-suud-o-ziyaa.N the pahale

[vaaqif-suud-o-ziyaa.N = aware of profit and loss]

dil se jaise ko_ii kaa.NTaa nikalaa
ashk aa.Nkho.n se ravaa.N the pahale

ab faqat anjuman_aaraa_ii hai.n
aitabaar-e-dil-o-jaa.N the pahale

[faqat = merely; anjuman = gathering (place)]
[aaraa_ii = decoration]
[aitabaar-e-dil-o-jaa.N = those who had complete faith]

dosh pe sar hai ki hai barf jamii
ham to sholo.n kii zubaa.N the pahale

[dosh = shoulder]

ab to har taazaa sitam hai tasliim
haadase dil pe garaa.N the pahale 

merii ham_zaad hai tanhaa_ii merii
aise rishte bhii kahaa.N the pahale

biimaar hai.n to ab dam-e-isaa kahaa.N se aaye
us dil me.n dard-e-shauq-o-tamannaa kahaa.N se aaye 

[dam-e-isaa=breath of Jesus] 

bekaar sharaa-e-lafz-o-maanii se faayedaa
jab tuu nahii.n to shahar me.n tujh saa kahaa.N se aaye 

har chashm sang-e-Khizb-o-adaavat se surKh hai
ab aadamii ko zindagii karanaa kahaa.N se aaye 

[chashm=eye; sang=stone; Khizb=lies; adaavat=spite; surKh=red]
[zindagii karanaa=to live life; to make something of life] 

vahashat havas kii chaaT ga_ii Khaak-e-jism ko
be-dar gharo.n me.n shaql kaa saayaa kahaa.N se aaye 

[vahashat=terror; havas=lust; Khaak=dust]
[jism=body; be-dar=without doors; shaql=face] 

ja.D se ukha.D gaye to badalatii ruto.n se kyaa
be-aab aa_iino.n me.n saraapaa kahaa.N se aaye 

[ja.D=root; be-aab aa_iinaa=a mirror incapable of reflecting images]
[saraapaa=from head to toe/full image] 

saayo.n pe aitamaad se uktaa gayaa hai jii
tuufaan me.n zindagii kaa bharosaa kahaa.N se aaye 

[aitamaad=faith] 

Gam ke thapere le gaye naagi.n se lambe baal
raato.n me.n ja.ngalo.n kaa vo saayaa kahaa.N se aaye 

’Naheed’ faishano.n ne chhupaaye hai.n aib bhii
chashme.n na ho.n to aa.Nkh kaa pardaa kahaa.N se aaye 

tum aaj ha.Nsate ho ha.Ns lo mujh par ye aazamaaish naa baar baar hogii
mai.n jaana taa huu.N mujhe Khabar hai ki kal fazaa Khushagavaar hogii

rahe muhabbat me.n zindagii bhar rahegii ye kashamakash baraabar
naa tumako qurabat me.n jiit hogii naa mujhako furaqat me.n haar hogii

hazaar ulfat sataaye lekin mere iraado.n se hai ye mumakin
agar sharaafat ko tumane chhe.Daa to zindagii tum pe vaar hogii

tujhii ko jo yaa.N jalwaa farmaa na dekhaa
baraabar hai duniyaa ko dekhaaa na dekhaa

meraa Gu.nchaa-e-dil hai woh dil-girifataa
ke jis ko kaso ne kabhii waa na dekhaa

aziat, musibat, malaamat, balaaye.n
tere ishq me.n ham ne kyaa kyaa na dekhaa

kiyaa mujh ko daaGo.n sarv-e-chiraaGaa.N
kabho tu ne aakar tamaashaa na dekhaa

taGaaful ne tere ye kuchh din dikhaaye
idhar tu ne lekin na dekhaa, na dekhaa

hijaab-e-ruKh-e-yaar the aap hii ham
khulii aa.Nkh jab, koii paradaa na dekhaa

shab-o-roz aye "Dard" darapaaii huu.N us ke
kaso ne jise yaa.N samajhaa na dekhaa

tohamate.n cha.nd apane zimme dhar chale
jis liye aaye the so ham kar chale

zindagii hai yaa koii tuufaan hai
ham to is jiine ke haatho.n mar chale

kyaa hame.n kaam is gulo.n se ai sabaa
ek dam aaye idhar udhar chale

dosto dekhaa tamaashaa yaa.N kaa sab
tum raho Khush ham to apane ghar chale

aah bas jii mat jalaa tab jaaniye
jab koii afsun teraa us paar chale

shamaa kii maani.nd ham is bazm me.n
chashm-nam aaye the daaman-tar chale

Dhuu.Ndhate hai.n aap se usako pare
sheKh saahib chho.D ghar baahar chale

ham jahaa.N me.n aaye the tanhaavaale
saath apane ab use lekar chale

juu.N sharaar ai hasti-e-bebud yaa.N
baare ham bhii apanii baarii bhar chale

ek mai.n dil resh huu.N vaisaa hii dost
zaKhm kitano.n kaa sunaa hai bhar chale

ham na jaane paaye baahar aap se
vo bhii aa.De aa gayaa jidhar chale

saaqiiyaa yaa.N lag rahaa hai chal chalaao
jab talak bas chal sake saaGar chale

"Dard" kuchh maaluum hai ye log sab
kis taraf se aaye the kidhar chale

meraa jii hai jab tak terii justajuu hai
zabaan jab talak hai yahii guftaguu hai

Khudaa jaane kyaa hogaa a.njaam is kaa
mai.n besabar itanaa huu.N wo tu.nd Khuu hai

tamannaa hai terii agar hai tamannaa
terii aarazuu hai, agar aarazuu hai

kiyaa sair hamane gulzaar-e-duniyaa
gul-e-dostii me.n ajab rang-o-buu hai

Ganimat hai ye diid waa diid-e-yaaraa.N
jahaa.N mu.nd gayii aa.Nkh, mai.n huu.N na tu hai

nazar mere dil ki pa.Dii "dard" kis par
jidhar dekhataa huu.N wahii ruu-ba-ruu hai

jag me.n aakar idhar udhar dekhaa
tuu hii aayaa nazar jidhar dekhaa

jaan se ho gaye badan Khaalii
jis taraf tuune aa.Nkh bhar ke dekhaa

naalaa fariyaad aah aur zaarii
aap se ho sakaa so kar dekhaa

un labo.n ne kii na masihaa_ii
ham ne sau -sau tarah se mar dekhaa

zor aashiq mizaaj hai ko_ii
"Dard" ko qisaa-e-muKhtasar dekhaa

duniyaa me.n kaun kaun na yak baar ho gayaa
par muu.Nh phir is tarf na kiyaa us ne jo gayaa

phiratii hai merii khaak sabaa dar-ba-dar liye
aye chashm-e-ashkabaar ye kyaa tujh ko ho gayaa

aagaah is jahaa.N me.n nahiii.n Gair be Khudaa.N
jaagaa wahii idhar se jo muu.Nd aa.Nkh so gayaa

tuufaan-e-noah ne to Dubaaii zamiin faqat
mai.n nang-e-khalq saarii Khudaaii Dubo gayaa

baraham kahii.n na ho gul-o-bulbul kii aashatii
Darataa huu.N aaj baaG me.n wo tu.nd khuu gayaa

waaiz kise daraawe hai yom-ulhisaab se
giriyaa.N meraa to naamaa-e-aamal dho gaya

phule.nge is zabaa.N me.n bhii gulzar-e-maarafat
yaa.N mai.n zamiin-e-sher me.n ye tukhm bo gayaa

aaya na aitadaal par haragiz mazaaj-e-dahar
mai.n garche garm-o-sard-e-zamaanaa samo gaya

aye "Dard" jis kii aa.Nkh khulii is jahaa.N me.n
shabanam kii tarah jaan ko apanii wo ro gayaa