yaa rab! Gam-e-hijraa.N me.n itanaa to kiyaa hotaa
jo haath jigar pe hai vo dast-e-duaa hotaa 

[Gam-e-hijraa.N=sorrow of separation]
[dast-e-duaa=hands raised in prayer] 

ik ishq kaa Gam aafat aur us pe ye dil aafat
yaa Gam na diyaa hotaa yaa dil na diyaa hotaa 

Gairo.n se kahaa tum ne Gairo.n se sunaa tum ne
kuchh ham se kahaa hotaa kuchh ham se sunaa hotaa 

ummiid to ba.ndh jaatii taskii.n to ho jaatii
vaadaa na vafaa karate vaadaa to kiyaa hotaa 

naakaam-e-tamannaa dil is soch me.n rahataa hai
yuu.N hotaa to kyaa hotaa yuu.N hotaa to kyaa hotaa 

tujhe Dhuu.nDhataa thaa mai.n chaar-suu
terii shaan jalle jalaal huu.N
tuu milaa qariib-e-khoj luu.N
terii shaan jalle jalaal huu.N 

terii yaad me.n hai kalii-kalii
hai chaman chaman me.n hubal alii
tuu basaa hai phuul me.n huu-ba-huu
terii shaan jalle jalaal huu.N 

tere hukm se jo havaa chalii
to chaTak ke bolii kalii-kalii
hai kariim tuu rahiim tuu
terii shaan jalle jalaal huu.N 

teraa jalvaa dono.n jahaa.N me.n hai
teraa nuur dono.n makaa.N me.n hai
yahaa.N tuu hii vahaa.N tuu hii tuu
terii shaan jalle jalaal huu.N 

duniyaa se dil lagaakar duniyaa se kyaa milegaa
yaad-e-Khudaa kiye jaa tujh ko Khudaa milegaa 

daulat ho yaa hukuumat taaqat ho yaa javaanii
har chiiz miTane vaalii har chiiz aanii-jaanii
ye sab Guruur ik din miTTii me.n jaa milegaa 

aataa nahii.n palaTakar guzaraa huaa zamaanaa
kyaa Khvaab kaa bharosaa kyaa maut kaa Thikaanaa
ye zindagii ga.Nvaa kar kyaa faayedaa milegaa 

ye shab-e-firaq ye bebasii hai.n qadam qadam pe udaasiyaa.N
meraa saath ko_ii na de sakaa merii hasarate.n hai.n dhuaa.N dhuaa.N

mai.n ta.Dap ta.Dap ke jiyaa to kyaa mere Khvaab mujh se bichha.D gaye
mai.n udaas ghar kii sadaa sahii mujhe de na ko_ii tasalliyaa.N

chalii aisii dard kii aa.Ndhiyaa.N mere dil kii bastii uja.D ga_ii
ye jo raakh-sii hai bujhii bujhii hai.n isii me.n merii nishaaniyaa.N

ye fizaa jo gard-o-Gubaar hai merii bekasii kaa mazaar hai
mai.n vo phuul huu.N jo na khil sakaa merii zindagii me.n vafaa kahaa.N

terii guftaguu me.n hai jo chaashnii jo tere labo.n me.n halaavate.n
na suruur vo fasl-e-bahaar me.n na gulo.n me.n lataafate.n

kahaa.N rah ga_ii.n terii nigahate.n vo sabaa kidhar ko nikal ga_ii
terii aahaTo.n ko taras gaa_ii.n mere jism-o-jaa.N kii sama’ate.n

tere a.ng a.ng ami.n loch hai mere dil ke soz-o-Gadaaz kaa
mere Khuun-e-dil se raqam hu_ii.n tere rang-o-buu kii hikaayate.n

merii chashm-e-Gam dil-e-muzatarib Gam-e-aarazuu Gam-e-justajuu
liye phir rahaa huu.N nagar nagar kisii meherabaa.N kii amaanate.n

kabhii kitaabo.n me.n phuul rakhanaa
kabhii daraKhto.n pe naam likhanaa
hame.n bhii hai yaad aaj tak vo
nazar se harf-e-salaam likhanaa

[daraKht=tree; harf=letter (as in alphabet)]

vo chaa.Nd chehare vo bahakii baate.n
sulagate din the mahakatii raate.n
vo chhoTe-chhoTe se kaaGazo.n par
muhabbato.n ke payaam likhanaa

[payaam=message]

gulaab cheharo.n se dil lagaanaa
vo chupake chupake nazar milaanaa
vo aarazuuo.n ke Khvaab bunanaa
vo qissaa-e-naatamaam likhanaa

[qissaa=tale/story; naatamaam=unfinished]

mere nagar kii hasii.n fazaao
kahii.n jo un ke nishaan paao
to puuchhanaa ye kahaa.N base ho
kahaa.N hai.n un kaa qayaam(?) likhanaa

ga_ii ruto.n me.n "Hasan" hamaaraa
bas ek hii to ye mashaGalaa thaa
kisii ke chehare ko subah kahanaa
kisii kii zulfo.n ko shaam likhanaa

chaahat kaa ek miiThaa miiThaa dard jagaane shaam Dhale
terii yaade.n aa jaatii hai.n mujhako rulaane shaam Dhale

terii zulfe.n in kaa.Ndho.n par teraa cheharaa haatho.n me.n
mai.n ne bhii dekhe hai.n kitane Khvaab suhaane shaam Dhale

har din ham se vaadaa karake yuu.N hii agar ta.Dapaaoge
ik din yuu.N hii ho jaaye.nge ham bhii diivaane shaam Dhale

din ke ujaale me.n to manaa luu.N laakh yatan se bahalaa luu.N
lekin dil kaa paagal pa.nchhii ek na maane shaam Dhale

shabaab aayaa kisii but par fidaa hone kaa vaqt aayaa
merii duniyaa me.n ba.nde ke Khudaa hone kaa vaqt aayaa

u.nhe.n dekhaa to zaahid ne kahaa iimaan kii ye hai
ki ab i.nsaan ko sajadaa-ravaa hone kaa vaqt aayaa

takallum kii Khaamoshii kah rahii hai harf-e-matalab se
ki ashk-aamez nazaro.n se adaa hone kaa vaqt aayaa

[takallum=conversation; ashk-aamez=full of tears]

Khudaa jaane ye hai auj-e-yaqii.n yaa pastii-e-himmat
Khudaa se kah rahaa huu.N naaKhudaa hone kaa vaqt aayaa

[auj=height/zenith; pastii=lowest point/nadir; naaKhudaa=oarsman]

hame.n bhii aa pa.Daa hai dosto.n se kaam kuchh yaanii
hamaare dosto.n ke bevafaa hone kaa vaqt aayaa

vo baat baat pe jii bhar ke bolane vaalaa
ulajh ke rah gayaa, Dorii ko kholane vaalaa 

lo saare shahar ke patthar sameT laaye ham
kahaa.N hai ham ko shab-o-roz tolane vaalaa 

hamaaraa dil to samandar thaa us ne dekh liyaa
bahut udaas huaa zahar gholane vaalaa 

kisii kii mauj-e-ravaa.N se khaa gayaa kyaa maat
vo ek nazar me.n dilo.n ko TaTolane vaalaa 

vo aaj phir yahii doharaa ke chal diyaa ’Bani’
mai.n bhuul ke nahii.n ab tujh se bolane valaa 

subah kii pahalii duaa se aashanaa hotaa huaa
ek sannaaTaa hai maanuus-e-sadaa hotaa huaa 

[aashanaa=acquainted; maanuus-e-sadaa=familiar sound] 

jaate mausam kii ajab tasviir hai chaaro.n taraf
darmiyaa.N us ke hai ik pattaa haraa hotaa huaa 

itanii aagaahii to hai mai.n ba.Dh rahaa huu.N kis taraf
ye nahii.n maaluum kis se huu.N judaa hotaa huaa 

[aagaahii=to know beforehand] 

ik navaa aahistaa aahistaa fanaa hotii hu_ii
ek harf-e-sad-talab chup chup adaa hotaa huaa 

[fanaa=destroyed; harf-e-sad-talab=word for a thousand desires] 

dekh mai.n apanii jagah se ik qadam sarakaa nahii.n
dekh terii hii nishaanii hai Khataa hotaa huaa 

[sarakaa=moved] 

ik nazar imkaa.N-hazaar-imkaa.N safar karatii hu_ii
ek manzar sau parat yaksar nayaa hotaa huaa