zi.ndaa rahe.n to kyaa hai jo mar jaaye.N ham to kyaa
duniyaa me.n Khaamoshii se guzar jaaye.N ham to kyaa

hastii hii apanii kyaa hai zamaane ke saamane
ek Khvaab hai.n jahaa.N me.n bikhar jaaye.N ham to kyaa

ab kaun mu.ntazir hai hamaare liye vahaa.N
shaam aa ga_ii hai lauT ke ghar jaaye.N ham to kyaa

[mu.ntazir=waiting]

dil kii Khalish to saath rahegii tamaam umr
dariyaa-e-Gam ke paar utar jaaye.N ham to kyaa

us simt mujh ko yaar ne jaane nahii.n diyaa
ek aur shahar-e-yaar me.n aane nahii.n diyaa

kuchh aur vaqt chaahate the ki soche.n tere liye
tuune vo vaqt ham ko zamaane nahii.n diyaa

ma.nzil hai is mahak kii kahaa.N kis chaman me.n hai
is kaa pataa safar me.n havaa ne nahii.n diyaa

rokaa anaa ne kaavish-e-besud se mujhe
us but ko apanaa haal sunaane nahii.n diyaa

hai jis ke baad ahad-e-zavaal-aashnaa "Munir"
itanaa kamaal ham ko Khudaa ne nahii.n diyaa

us bevafaa kaa shahar hai aur ham hai.n dosto.n
ashk-e-ravaa.N kii nahar hai aur ham hai.n dosto.n

shaam-e-aalam Dhalii to chalii dard kii havaa
raato.n kaa pichhalaa pahar hai aur ham hai.n dosto.n

aa.Nkho.n me.n u.D rahii hai luTii mahafilo.n kii dhuul
ibrat bara-e-dahar hai aur ham hai.n dosto.n

ye ajanabii sii ma.nzile.n aur raftagaa.N kii yaad
tanha_iiyo.n kaa zahar hai aur ham hai.n dosto.n

[raftagaa.N=departed ones]

un se nain milaakar dekho
ye dhokhaa bhii khaa kar dekho

duurii me.n kyaa bhed chhipaa hai
isakii khoj lagaakar dekho

[bhed=secret]

kisii akelii shaam kii chup me.n
giit puraane gaakar dekho

aaj kii raat bahut kaalii hai
soch ke diip jalaa kar dekho

jaag-jaag kar umr kaTii hai
nii.nd ke dvaar hilaakar dekho

[dvaar=door]

to.Danaa TuuTe huye dil kaa buraa hotaa hai
jis kaa ko_ii nahii.n us kaa to Khudaa hotaa hai

maa.Ng kar tum se Khushii luu.N mujhe ma.nzuur nahii.n
kis kaa maa.Ngii hu_ii daulat sebhalaa hotaa hai

log naahak kisii majabuur ko kahate hai.n buraa
aadamii achchhe hai.n par vaqt buraa hotaa hai

kyo.n "Munir" apanii tabaahii kaa ye kaisaa shikavaa
jitanaa taqadiir me.n likhaa hai adaa hotaa hai

kabhii kisii baam ke kinaare
uge huye pe.D ke sahaare
mujhe milii hai.n vo mast aa.Nkhe.n
jo dil ke paataal me.n utar kar
gaye dino.n kii gufaa me.n jho.nke

kabhii kisii ajanabii nagar me.n
kisii akele udaas ghar me.n
parii_ruKho.n kii hasii.n sabhaaye.n
ko_ii bahaar-e-gurez paaye.n

kabhii sar-e-rah sar-e-kuu
kabhii pas-e-dar kabhii lab-e-juu
mujhe milii hai.n vahii nigaahe.n
jo ek lamhe kii dostii me.n
hazaar baato.n ko kahanaa chaahe.n

raat behad chup hai
aur us kaa andheraa surmagii.n
shaam pa.Date hii damakate the jo rango.n ke nagii.n
duur tak bhii ab kahii.n
us kaa nishaa.N milataa nahii.n

ab to ba.Dhataa aayegaa
ghan_ghor baadal chaah kaa
us me.n bahatii aayegii
ek mad_bharii miiThii sadaa
dil ke suune shahar me.n guu.Njegaa naGmaa chaah kaa

raat ke parde me.n chhup kar Khuu.N rulaatii chaahato
is qadar kyo.n duur ho
mujh se zaraa ye to kaho
mere paas aakar kabhii merii kahaanii bhii suno
siskiyaa.N letii havaaye.n kah rahiihai.n - ’chup raho’

phuul the baadal bhii thaa aur vo hasii.n suurat bhii thii
dil me.n lekin aur hii ek shaql kii hasarat bhii thii

jo havaa me.n ghar banaaye kaash ko_ii dekhataa
dasht me.n rahate the par taamiir kii aadat bhii thii

kah gayaa mai.n saamane us ke jo dil kaa mudd’a
kuchh to mausam bhii ajab thaa kuchh merii himmat bhii thii

ajanabii shaharo.n me.n rahate umr saarii kaT ga_ii
go zaraa se faasale par ghar kii har raahat bhii thii

kyaa qayaamat hai "Munir" ab yaad bhii aate nahii.n
vo puraane aashnaa jin se hame.n ulfat bhii thii

vo din bhii aane vaalaa hai
jab terii in kaalii aa.Nkho.n me.n
har jazbaa miT jaayegaa
tere baal ji.nhe.n dekhe.n to
saavaan kii ghanaghor ghaTaaye.n
aa.Nkho.n me.n laharaatii hai.n

ho.nTh rasiile
dhyaan me.n laakho.n phuulo.n kii
mahakaar jagaaye.n
vo din duur nahii.n jab in par
patajhar kii rut chhaa jaayegii

aur us patajhar ke mausam kii
kisii akelii shaam kii chup me.n
gaye dino.n kii yaad aayegii
jaise ko_ii kisii ja.ngal me.n
giit suhaane gaataa hai

- tujh ko paas bulaataa hai

laakho.n shaklo.n ke mele me.n tanhaa rahanaa meraa kaam
bhes badal kar dekhate rahanaa tez havaao.n kaa koharaam
ek taraf aavaaz kaa suuraj ek taraf ik guungii shaam
ek taraf jismo.n kii Khushbuu ek taraf is kaa anjaam
ban gayaa qaatil mere liye to apanii hii nazaro.n kaa daam
sab se ba.Daa hai naam Khudaa kaa us ke baad hai meraa naam

[shakl = face; tanhaa = lonely; koharam = loud noise/chaotic din]
[guungii = mute; anjaam = result; qaatil = murderer; daam = trap/net]