ye i.ntazaar Galat hai ki shaam ho jaaye
jo ho sake to abhii daur-e-jaam ho jaaye

Khudaa-na Khvaastaa piine lage jo vaa_iz bhii
hamaare vaaste piina haraam ho jaaye

mujh jaise ri.nd ko bhii tuu ne hashr me.n yaa rab
bulaa liyaa hai to kuchh intazaam ho jaaye

vo sahan-e-baaG me.n aaye hai.n may-kashii ke liye
Khudaa kare ke har ik phuul jaam ho jaaye

mujhe pasand nahii.n is pe gaam-zan honaa
vo rah-guzar jo guzar-gaah-e-aam ho jaaye

phir is duniyaa se ummiid-e-vafaa hai
tujhe ai zindagii kyaa ho gayaa hai

ba.Dii zaalim nihaayat bevafaa hai
ye duniyaa phir bhii kitanii Khush-numaa hai

har ik apane hii Gam me.n mubtilaa hai
kisii ke dard se kaun aashnaa hai

mere naqqaad merii shaayarii to
mere TuuTe huye dil kii sadaa hai

kahaa.N huu.N "Shad" mai.n to shaad saa huu.N
vo shaad-e-Khush-navaa to mar chukaa hai

jab bhii us gul-badan kii yaad aa_ii
ho ga_ii pur-bahaar tanhaa_ii

chau.Nk uThe haadasaat duniyaa ke
mere ho.nTho.n pe jab ha.Nsii aa_ii

[haadasaat=calamities]

jab kisii ne tumhaaraa naam liyaa
jaane kyuu.N mujh ko apanii yaad aa_ii

dekh ai sheKh mere saaGar me.n
apanii jannat kii jalvaa-faramaa_ii

[saaGar=wine-cup/goblet; jalvaa-faramaa_ii=view/manifestation]

hosh me.n "Shad" jab tujhe paayaa
tujh me.n ham ne terii kamii paa_ii

dil-e-pur_aarazuu naakaam hokar
zyaadaa Khuubasuurat ho gayaa hai

karam aise kiye hai.n dosto.n ne
ki har dushman pe pyaar aane lagaa hai

teraa Gam to merii jaan-e-tamannaa
terii suurat se ba.Dhakar dil_rubaa hai

jab aaye to ujaalaa ho gayaa thaa
gaye to phir vahii ghar kii fazaa hai

nahii.n hai apanaa Gam ai "Shad" jab se
zamaane bhar kaa Gam apanaa liyaa hai