aap ko bhuul jaaye.n ham itane to bevafaa nahii.n
aap se kyaa gilaa kare.n aap se kuchh gilaa nahii.n

shiishaa-e-dil ko to.Danaa unakaa to ek khel hai
hamase hii bhuull ho ga_ii unakii ko_ii Khataa nahii.n

kaash vo apane Gam mujhe de de.n to kuchh sukuu.N mile
vo kitanaa badanasiib hai Gam hii jise milaa nahii.n

karanaa hai gar vafaa to kyaa kaise vafaa ko chho.D duu.N
kahate hai.n is gunaah kii hotii ko_ii sazaa nahii.n

kis se puuchhe.n ham ne kahaa.N wo cheharaa-e-roshan dekhaa hai
mehfil mehfil Dhuu.NDh chuke hai.n gulshan gulshan dekhaa hai

kis ko dekhe.n kis ko na dekhe.n, phuul bhii hai.n kaliyaa.n bhii magar
jis se lagaayii aa.Nkh usii ko dil kaa dushman dekhaa hai

rang-e-bahaar-e-subah-e-gulistaa.N kyaa dekhe wo diiwaanaa
jis ki nazar ne ek hii gul me.n saaraa gulshan dekhaa hai

ahl-e-wafaa kii Khuun kii chhii.nTe.n duur tak u.Dakar jaatii hai.n
meraa ta.Dapanaa dekhane waale apanaa bhii daaman dekhaa hai?

aaj u.nhe.n jo chaahe samajh lo warnaa yahii ’taskii.n’ hai.n ji.nhe.n
kal tak ham ne kuu-e-butaa.N me.n Khaak_ba_daaman dekhaa hai

Khayaal-e-kaabaa-o-taibaa mai.n kis tarah bhuuluu.N
ye zindagii kaa sahaaraa mai.n kis tarah bhuuluu.N

gunaahagaaro.n se ahakaaro.n kam nasiib sahii
Gulaam huu.N dar-e-aakaa mai.n kis tarah buuluu.N

bahaar-e-subah-e-haram kyo.n na mujhe yaad aaye.n
sawaad-e-shaam-e-madiinaa mai.n kis tarah bhuuluu.N

maze uThaaye hai.n izahaar-e-dard-e-dil ke jahaa.N
wo ashk-o-aah kii duniyaa mai.n kis tarah bhuuluu.N

hazaar bekhudi-e-shauq ho.n magar ’taskeen’
Khud apane dil kaa fasaanaa mai.n kis tarah bhuuluu.N

dil aur wo bhii TuuTaa huaa dil
ab zindagii hai jiine ke qaabil

kyaa zindagii kaa ehasaas-e-shaamil
tere baGair ek Gaarat-garii dil

hotaa hai jitanaa Khuun-e-tamannaa
ba.Datii hai utanii rangiinii-e-dil

josh-e-junuu.N me.n yak saa hai dono
kyaa gard-e-sehraa, kyaa Khaak-e-ma.nzil

taqdiir-e-insaa.N aur ye zamaanaa
ek marG-e-aasaa.N aur wo bhii mushqil

lab par tabassum, aa.Nkho.n me.n aa.Nsuu
ham likh rahe.n hai.n afsaanaa-e-dil

’taskeen’ se aksar ham bhii mile hai.n
kuchh bhii ho lekin hai saahib-e-dil

dab-dabaa aayii wo a.Nkhe.n jo meraa naam aayaa
ishq naakaaam sahii phit bhii bahot kaam aayaa

lazzat-e-marG-e-mohabbat koii us se puuchhe
jisake lab par dam-e-aakhir bhii teraa naam aayaa

zindagii tere tasavvur se alag rah na sakii
naGmaa koii ho magar saaz yahii kaam aayaa

ham pe aisii bhii Gam-e-ishq me.n raate.n guzarii.n
jab tak aa.Nsuu na bahe, dil ko na aaraam aayaa

ab to yahii hai.n dil kii duaaye.n
bhuulane waale bhuul hi jaaye.n

wajah-e-sitam kuchh ho to bataaye.n
ek mohabbat, laakh Khataaye.n

dard-e-mohabbat, dil me.n chhupaayaa
aa.Nkh ke aa.Nsuu kaiise chhupaaye.n

hosh aur un kii diid kaa daawaa
dekhanewaale.n, hosh me.n aaye.n

dil ki tabaahii bhuule nahii.n ham
dete hai.n ab tak unko du’aaye.n

rang-e-zamaanaa dekhanewaale
un kii nazar bhii dekhate jaaye.n

shuGl-e-mohabbat ab hai ye ’Taskii.n’
sher kahe.n aur jii bahalaaye.n

merii vafaaye.n yaad karoge
ro_oge, fariyaad karoge

mujhako to barbaad kiyaa hai
aur kise barbaad karoge

ham bhii ha.Nsange tum par ik din
tum bhii kabhii fariyaad karoge

mahafil kii mahafil hai Gam-gii.n
kis-kis kaa dil shaad karoge

[Gam-gii.n=steeped in sorrow; shaad=bring joy to]

dushman tak ko bhuul gaye ho
mujhako tum kyaa yaad karoge

jaakar bhii naashaad kiyaa thaa
aakar bhii naashaad karoge

[naashaad=unhappy]

chho.Do bhii ’Taseer’ kii baate.n
kab tak us ko yaad karoge

ik na ik shammaa a.ndhere me.n jalaaye rakhiye
subah hone ko hai maahaul banaaye rakhiye

jin ke haatho.n se hame.n zaKhm-e-nihaa.N pahu.Nche hai.n
vo bhii kahate hai.n ki zaKhmo.n ko chhupaaye rakhiye

kaun jaane ki vo kis raah-guzar se guzare
har guzar-gaah ko phuulo.n se sajaaye rakhiye

daaman-e-yaar kii ziinat na bane har aa.Nsuu
apanii palako.n ke liye kuchh to bachaaye rakhiye

kaise maanuu.N ki zamaane kii Khabar rakhatii hai
gardish-e-vaqt to sirf apanii Khabar rakhatii hai

merii pairo.n kii thakan tum ruuTh na jaanaa mujh ko
ek tuu hii to meraa raaz-e-safar rakhatii hai

dostii terii daraKhto.n me.n havaaye.n bhii nahii.n
dushmanii apane daraKhto.n me.n samar rakhatii hai

[daraKht = tree; samar = fruit]

jab kabhii bolanaa vaqt par bolanaa
muddato.n bolanaa muKhtasar bolanaa

Daal degaa halaaqat me.n ik din tujhe
ai parinde teraa shaaKh par bolanaa

pahale kuchh duur tak saath chal ke parakh
phir mujhe ham_safar ham_safar bolanaa

umr bhar ko mujhe besadaa kar gayaa
teraa ik baar muu.Nh pher kar bolanaa

merii Khaanaabadoshii se puuchhe ko_ii
kitanaa mushkil hai raste ko ghar bolanaa

kyuu.N hai Khaamosh sone kii chi.Diyaa bataa
lag ga_ii tujh ko kis kii nazar bolanaa