teraa meraa jhaga.Daa kyaa jab ik aa.Ngan kii miTTii hai
apane badan ko dekh le chhuukar mere badan kii miTTii hai 

bhuukhii pyaasii bhaTak rahii hai dil me.n kahii.n ummiid liye
ham aur tum jis me.n khaate the us bartan kii miTTii hai 

Gairo.n ne kuchh Khvaab dikhaakar niind churaalii aa.Nkho.n se
lorii de de haar ga_ii jo ghar aa.Ngan kii miTTii hai 

soch samajhakar tum ne jis ke sabhii gharonde to.D diye
apane saath jo khel rahaa thaa us bachapan kii miTTi hai 

chal nafarat ko chho.D ke ’Anjum’ dil ke rishte jo.D ke ’Anjum’
is miTTii kaa qarz utaare.n apane vatan kii miTTii hai 

jab kabhii teraa naam lete hai.n
dil se ham intaqaam lete hai.n 

merii barbaadiyo.n ke afasaane
mere yaaro.n kaa naam lete hai.n 

bas yahii ek jurm hai apanaa
ham muhabbat se kaam lete hai.n 

har qadam par gire par siikhaa
kaise girato.n ko thaam lete hai.n 

ham bhaTak kar junuu.N kii raaho.n me.n
aql se intaqaam lete hai.n 

ham_safar hotaa ko_ii to baa.NT lete duuriyaa.N
raah chalate log kyaa samajhe.n merii majabuuriyaa.N 

muskuraate Khvaab chunatii gun_gunaatii ye nazar
kis tarah samajhe merii qismat kii naamanzuuriyaa.N 

haadaso.n kii bhii.D hai chalataa huaa ye kaaravaa.N
zindagii kaa naam hai laachaariyaa.N majabuuriyaa.N 

phir kisii ne aaj chhe.Daa zikr-e-manzil is tarah
dil ke daaman se lipaTane aa ga_ii hai.n duuriyaa.N 

Gam-e-hayaat kaa jaga.Daa miTaa rahaa hai ko_ii
chale bhii aao ke duniyaa se jaa rahaa hai ko_ii 

[Gam-e-hayaat=sorrows of life] 

kaho ajal se zaraa do gha.Dii Thahar jaaye
sunaa hai aane kaa vaadaa nibhaa rahaa hai ko_ii 

[ajal=death] 

vo aaj lipaTe hai.n kis naazukii se laashe ko
ke jaise ruuTho.n huo.n ko manaa rahaa hai ko_ii 

[naazukii=tenderness; laashe=dead body] 

kahii.n palaT ke na aa jaaye saa.Ns nabzo.n me.n
hasiin haatho.n se mayyat sajaa rahaa hai ko_ii 

[nabz=pulse; mayyat=corpse] 

Gamo.n ne gher liyaa hai mujhe to kyaa Gam hai
mai.n muskuraa ke jiyuu.Ngaa terii Khushii ke liye
kabhii kabhii tuu mujhe yaad kar to letii hai
sukuun itanaa saa kaafii hai zindagii ke liye 

ye vaqt jis ne palaT kar kabhii nahii.n dekhaa
ye vaqt ab bhii muraado.n ke phal laataa hai
vo mo.D jis ne hame.n ajanabii banaa Daalaa
us ek mo.D pe dil ab bhii gun_gunaataa hai 

fizaaye.n rukatii hai.n raaho.n par jin se ham guzare
ghaTaaye.n aaj bhii jhuk kar salaam karatii hai.n
har ek shab ye sunaa hai falak se kuchh pariyaa.N
vafaa kaa chaa.Nd hamaare hii naam karatii hai.n 

ye mat kaho ki muhabbat se kuchh nahii.n paayaa
ye mere giit mere zaKhm-e-dil kii rulaa_ii
jinhe.n tarasatii rahii anjuman kii rangiinii
mujh milii hai muqaddar se aisii tanhaa_ii 

chalo baa.NT lete hai.n apanii sazaaye.n
naa tum yaad aao naa ham yaad aaye.n

sabhii ne lagaayaa hai chehare pe cheharaa
kise yaad rakhe.n kise bhuul jaaye.n

unhe.n kyaa Khabar ho aanevaalaa naa aayaa
barasatii rahii.n raat bhar ye ghaTaaye.n