zindagii jaisii tamannaa thii nahii.n kuchh kam hai
har gha.Dii hotaa hai ehasaas kahii.n kuchh kam hai 

ghar kii taamiir tasavvur hii me.n ho sakatii hai
apane naqshe ke mutaabiq ye zamii.n kuchh kam hai 

bichha.De logo.n se mulaaqaat kabhii phir hogii
dil me.n ummiid to kaafii hai yaqii.n kuchh kam hai 

ab jidhar dekhiye lagataa hai ki is duniyaa me.n
kahii.n kuchh chiiz ziyaadaa hai kahii.n kuchh kam 

aaj bhii hai terii duurii hii udaasii kaa sabab
ye alag baat ki pahalii sii nahii.n kuchh kam hai 

zindagii jab bhii terii bazm me.n laatii hai hame.n
ye zamii.n chaa.Nd se behatar nazar aatii hai hame.n 

surKh phuulo.n se mahak uThatii hai.n dil kii raahe.n
din Dhale yuu.N terii aavaaz bulaatii hai hame.n 

yaad terii kabhii dastak kabhii saragoshii se
raat ke pichhale pahar roz jagaatii hai hame.n 

har mulaaqaat kaa anjaam judaa_ii kyuu.N hai
ab to har vaqt yahii baat sataatii hai hame.n 

ye kyaa jagah hai dosto ye kaun saa dayaar hai
hadd-e-nigaah tak jahaa.N Gubaar hii Gubaar hai 

ye kis mukaam par hayaat mujh ko leke aa ga_ii
na bas Khushii pe hai jahaa.N na Gam pe iKhtiyaar hai 

tamaam umr kaa hisaab maa.Ngatii hai zindagii
ye meraa dil kahe to kyaa ye Khud se sharm_saar hai 

bulaa rahaa kyaa ko_ii chilamano.n ke us taraf
mere liye bhii kyaa ko_ii udaas beqaraar hai 

na jis kii shakl hai ko_ii na jis kaa naam hai ko_ii
ik aisii shai kaa kyo.n hame.n azal se intazaar hai 

siine me.n jalan aa.Nkho.n me.n tuufaan saa kyuu.N hai
is shahar me.n har shaKhs pareshaan saa kyuu.N hai 

dil hai to dha.Dakane kaa bahaanaa ko_ii Dhuu.NDhe
patthar kii tarah behis-o-bejaan saa kyuu.N hai 

tanhaa_ii kii ye kaun sii manzil hai rafiiqo
taa-hadd-e-nazar ek bayaabaan saa kyuu.N hai 

ham ne to ko_ii baat nikaalii nahii.n Gam kii
vo zuud-e-pashemaan pashemaan saa kyuu.N hai

kyaa ko_ii na_ii baat nazar aatii hai ham me.n
aa_iinaa hame.n dekh ke hairaan saa kyuu.N hai 

davaao.n kii alamaariyo.n se sajii
ik dukaa.N me.n
mariizo.n ke anboh me.n muzmahil saa
ik insaa.N kha.Daa hai
jo ik kuba.Dii sii shiishii ke
siine pe likhe hue
ek ik harf ko Gaur se pa.Dh rahaa hai
magar is pe to zahar likkhaa huaa hai
is insaan ko kyaa marz hai
ye kaisii davaa hai

kiyaa iraadaa baarahaa tujhe bhulaane kaa
milaa na uzr hii ko_ii magar Thikaane kaa 

ye kaisii ajanabii dastak thii kaisii aahaT thii
tere sivaa thaa kise haq mujhe jagaane kaa 

ye aa.Nkh hai ki nahii.n dekhaa kuchh sivaa tere
ye dil ajab hai ki Gam hai ise zamaane kaa 

vo dekh lo vo samandar Khushk hone lagaa
jise thaa daavaa merii pyaas ko bujhaane kaa 

zamii.n pe kis liye zanjiir ho gaye saaye
mujhe pataa hai magar mai.n nahii.n bataane kaa 

kis-kis tarah se mujh ko na rusvaa kiyaa gayaa
Gairo.n kaa naam mere lahuu se likhaa gayaa 

nikalaa thaa mai.n sadaa-e-jaras kii talaash me.n
bhuule se is sukuut ke seharaa me.n aa gayaa 

[jaras=bell; sukuut=silence] 

kyo.n aaj us kaa zikr mujhe Khush na kar sakaa
kyo.n aaj us kaa naam meraa dil dukhaa gayaa 

is haadase ko sun ke karegaa yaqii.n ko_ii
suuraj ko ek jho.nkaa havaa kaa bujhaa gayaa 

kabhii kisii ko mukammal jahaa.N nahii.n milataa
kahii.n zamii.n to kahii.n aasmaa.N nahii.n milataa 

jise bhii dekhiye vo apane aap me.n gum hai
zubaa.N milii hai magar ham_zubaa.N nahii.n milataa 

bujhaa sakaa hai bhalaa kaun vaqt ke shole
ye aisii aag hai jis me.n dhuaa.N nahii.n milataa 

tere jahaan me.n aisaa nahii.n ki pyaar na ho
jahaa.N ummiid ho is kii vahaa.N nahii.n milataa

kabhii kisii ko mukammal jahaa.N nahii.n milataa
kahii.n zamii.n to kahii.n aasmaa.N nahii.n milataa 

jise bhii dekhiye vo apane aap me.n gum hai
zubaa.N milii hai magar ham_zubaa.N nahii.n milataa 

bujhaa sakaa hai bhalaa kaun vaqt ke shole
ye aisii aag hai jis me.n dhuaa.N nahii.n milataa 

tere jahaan me.n aisaa nahii.n ki pyaar na ho
jahaa.N ummiid ho is kii vahaa.N nahii.n milataa

justajuu jis kii thii us ko to na paayaa ham ne
is bahaane se magar dekh lii duniyaa ham ne

tujh ko rusavaa na kiyaa Khud bhii pashemaa.N na huye
ishq kii rasm ko is tarah nibhaayaa ham ne

kab milii thii kahaa.N bichha.Dii thii hame.n yaad nahii.n
zindagii tujh ko to bas Khvaab me.n dekhaa ham ne

ai ’Ada’ aur sunaaye bhii to kyaa haal apanaa
umr kaa lambaa safar tay kiyaa tanhaa ham ne