tum se ulfat ke taqaaze na nibaahe jaate
varnaa ham ko bhii tamannaa thii ke chaahe jaate

[taqaaze = demands]

dil ke maaro kaa na kar Gam ki ye andoh_nasiib
zaKhm bhii dil me.n na hotaa to karaahe jaate

[andoh_nasiib = unfortunate (people)]

dii na mohalat hame.n hastii ne vafaa kii varnaa
aur kuchh din Gam-e-hastii se nibaahe jaate

nazar se justajuu bekaar nikalii
Khud apane aap se do-chaar nikalii

Kirad ko thii ye Khush_fahamii ki dar hai
pas-e-diivaar bhii diivaar nikalii

mujhe hasarat thii jis taab-e-suKhan kii
vahii shai is kii bhii dar_kaar nikalii

chhuTaa aaKhir ko duniyaa se to dekhaa
mohabbat hii gale kaa haar nikalii

nigaahe.n jhuk ga_iii.n jab Khud_pasandii
barahanaa barasar-e-darbaar nikalii

nihaal-e-fiqr kii shaaKhe.n namuudaar
qalam hokar bhii kyaa gul_naar nikalii

bhalaa hotaa hai kyaa kahane se ’Haqi’
chalo kuchh Khvaahish-e-izhaar nikalii

bhulaa do ranj kii baato.n me.n kyaa hai
idhar dekho merii aa.Nkho.n me.n kyaa hai

bahut taariik din hai phir bhii dekho
ujaalaa chaa.Ndanii raato.n me.n kyaa hai

[taariik - dark]

nahii.n paatii.n jise bedaar nazare.n
Khudaayaa ye mere Khvaabo.n me.n kyaa hai

[bedaar - sleepless/wakeful]

ye kyaa Dhuu.NDhe chale jaatii hai duniyaa
tamaashaa-saa galii-kuucho.n me.n kyaa hai

hai vahashat-sii ye har chehare pe kaisii
na jaane saham-saa nazaro.n me.n kyaa hai

[vahashat = fear]

ye ik haijaan-saa dariyaa me.n kyo.n hai
ye kuchh saamaan-saa maujo.n me.n kyaa hai

[haijaan = disturbance; saamaan = arrangement]

zaraa-saa bal hai ik zulfo.n kaa us kii
vagarnaa zor zanjiiro.n me.n kyaa hai

hai.n Khamyaaze suruur-e-aarazuu ke
nishaat-o-Gam kaho naamo.n me.n kyaa hai

[Khamyaaze = result; suruur-e-aarazuu = intoxication of desire]
[nishaat-o-Gam = happiness and sorrow]

tumhaarii der-aamezii bhii dekhii
takalluf lakhanau vaalo.n me.n kyaa hai

[der-aamezii = late (for a) meeting; takalluf = formality]