tere paas aane ko jii chaahataa hai
naye zaKhm khaane ko jii chaahataa hai

idhar aaye shaayad vo mauj-e-tarannum
Gazal gungunaane ko jii chaahataa hai

zamaanaa meraa aazamaayaa huaa hai
tujhe aazamaane ko jii chaahataa hai

vahii baat rah rah ke yaad aa rahii hai
jise bhuul jaane ko jii chaahataa hai

labo.n par mere khelataa hai tabassum
jab aa.Nsuu bahaane ko jii chaahataa hai

[tabassum = smile]

ka_ii martabaa dil pe bijalii girii hai
magar muskuraane ko jii chaahataa hai

[ka_ii martabaa = several times]

takalluf na kar aaj barq-e-tajallii
nasheman jalaane ko jii chaahataa hai

[takalluf karanaa = to be formal; barq = lightning]
[tajallii = brilliant light]

ruKh-e-zindagii se naqaabe.n ulaT kar
haqiiqat dikhaane ko jii chaahataa hai

[haqiiqat = reality]

shamiim-e-zulf-e-yaar aaye na aaye
mere dil ko qaraar aaye na aaye

abhii aayaa hai hosh yaad-e-jaanaa.N
na ta.Dapaa, baar-bar aaye na aaye

chiraaG-e-zindagaanii bujh rahaa hai
vo jaan-e-intazaar aaye na aaye

kiyaa jo tum ne apane dil se puuchho
hamaaraa aitabaar aaye na aaye

nigaah-e-ahal-e-gul_shan kah rahii hai
Khizaa.N jaaye bahaar aaye na aaye

ba.Dhegaa kaaravaa.N manzil-ba-manzil
Gubaar-e-raah_guzar aaye na aaye

jab vo masaruur nazar aataa hai
har taraf nuur nazar aataa hai

[masaruur = happy; nuur = light]

mai.n to maiKhvaar huu.N tuu kyo.n saaqii
nashe me.n chuur nazar aataa hai

[maiKhvaar = one who drinks wine]

qurb se haath uThaayaa mai.n ne
tuu ba.Dii duur nazar aataa hai

[qurb = vicinity/nearness]

mai.n hii tanhaa nahii.n dil ke haatho.n
tuu bhii majabuur nazar aataa hai

Khaak_saarii ko chhupaane ke liye
’Wajd’ maGaruur nazar aataa hai

[Khaak_saarii = humility]
[maGaruur = haughty/arrogant]