hameshaa hai vasl-o-judaa_ii kaa dhandhaa
buto.n kii hai ulfat Khudaa_ii kaa dhandhaa 

agar baiThe rindo.n kii sohabat me.n zaahid
to de.n chho.D sab paarasaa_ii kaa dhandhaa 

[rind = one who drinks; sohabat = company]
[zaahid = preacher/religious man; paarasaa_ii = self-restraint]

jo honaa hai aaKhir vo hokar rahegaa
kare kaun baKht_aazamaa_ii kaa dhandhaa 

[baKht_aazamaa_ii = testing one’s fate/luck]

pareshaa.N rahii umr bhar par na chho.Daa
terii zulf ne kaj_adaa_ii kaa dhandhaa 

[kaj_adaa_ii = crookedness (curliness)]

mubaarak ra_iiso.n ko kaar-e-riyaasat
gadaa ko hai kaafii gadaa_ii kaa dhandhaa 

[gadaa = beggar; gadaa_ii = begging]

nahii.n Khizr ke piichhe gar aur jhaga.De
to hai saath ik rah_numaa_ii kaa dhandhaa 

[rah_numaa_ii = guidance/to show the path]

’Zafar’ is se bahatar hai naa_aashanaa_ii
ki mushkil hai ye aashanaa_ii kaa dhandhaa