tu ne kuch bhi na kaha ho jaise mere hi dil ki sada ho jaise

tu ne kuch bhi na kaha ho jaise
mere hi dil ki sada ho jaise

yun teri yad se ji ghabraya
tu mujhe bhul gaya ho jaise

is tarah tujh se kiay hain shikwe
mujh ko apne se gila ho jaise

yun har ik naqsh pe jhukti hai jabin
tera naqsh-e-kaf-e-pa ho jaise

tere honton ki khafi si larzish
ik haseen shair hua ho jaise

Sufi Ghulam Mustafa Tabassaum

Leave a Reply